މޫސާ ނިޒާރު އިބްރާހީމް

އައްޝައިޚް މޫސާ ނިޒާރު އިބްރާހީމަކީ ވ. ކެޔޮދޫއަށް ނިސްބަތްވެވަޑައިގެންނަވާ ބޭފުޅެކެވެ. ބައްޕާފުޅަކީ ރައްޔިތުންގެ މަޖިލީހުގެ ވ. އަތޮޅުގެ މެންބަރުކަމާއި އެ އަތޮޅުގެ އަތޮޅުވެރިކަން ކުރައްވައިފައިވާ އިބްރާހިމް ކަލޭފާނެވެ.

އައްޝައިޚް މޫސާ ނިޒާރު އިބްރާހީމް އެންމެ ފުރަތަމަ ތަޢުލީމު ޙާޞިލުކުރެއްވީ ކެޔޮދޫ މަކުތަބުންނެވެ. 1983 ވަނަ އަހަރުގައި އޭނާ މާލެ ވަޑައިގެން ފުރަތަމަ ތަޢުލީމު ޙާޞިލުކުރެއްވީ އެމް.އީ.އެސް. ސްކޫލުންނެވެ. ދޮޅު އަހަރު އެތަނުގައި ކިޔަވައި ވިދާޅުވުމަށްފަހު ޢަރަބިއްޔާ ސްކޫލަށް ބަދަލުވެވަޑައިގަތެވެ. ސަރުކާރުން ދެއްވި ސްކޮލަރޝިޕެއްގައި ފުރަތަމަ ޑިގުރީ ޙާޞިލުކުރެއްވީ މިޞްރުގެ އަލްއަޒްހަރު ޔުނިވަރސިޓީން ޢަރަބި ބަހާއި އިސްލާމިކް ސްޓަޑީޒްގެ ދާއިރާއިންނެވެ. މާސްޓަރސް ޑިގުރީ ޙާޞިލުކުރެއްވީ ޕޮލިޓިކަލް ސައިންސުގެ ދާއިރާއިން މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީގައެވެ. މާސްޓަރސް ޑިގުރީގައި ޚާއްޞަވެވަޑައިގެންފައިވަނީ ޚާރިޖީ ދާއިރާއަށެވެ.

އައްޝައިޚް މޫސާ ނިޒާރު އިބްރާހީމް ސަރުކާރުގެ ވަޒީފާއެއްގެ ގޮތުގައި އެންމެ ފުރަތަމަ އަދާކުރެއްވީ މަޢުހަދުއް ދިރާސާތިލް އިސްލާމިއްޔާގެ ސެކްރެޓަރީ ކަމެވެ. އެއީ ސްކޫލް ނިންމެވުމަށް ފަހު މިޞްރަށް ކިޔަވައި ވިދާޅުވާން ވަޑައިގަތުމުގެ ކުރިންނެވެ. މިޞްރުގައި ކިޔަވައި ވިދާޅުވުމަށްފަހު މާލެ ވަޑައިގެން ދެން އަދާކުރެއްވީ މަޢުހަދުއް ދިރާސާތިލް އިސްލާމިއްޔާގެ މުދައްރިސްކަމެވެ. އޭގެފަހުން އަމީނިއްޔާ ސްކޫލުގައި އިސްލާމް މުދައްރިސެއްގެ ގޮތުގައި މަސައްކަތް ކުރެއްވުމަށްފަހު، ދެން ބަދަލުވެވަޑައިގެންނެވީ ކުރީގެ ޓީޗަރ އެޑިޔުކޭޝަން ސެންޓަރުގެ ޓީޗަރ އެޑިޔުކޭޓައެއްގެ ވަޒީފާ އަށެވެެ. އެތަން ކޮލެޖަކަށް ބަދަލުވުމުން އެތަނުގައި އެސިސްޓެންޓް ލެކްޗަރަރއެއްގެ ގޮތުގައި މަސައްކަތް ކުރެއްވިއެވެ. ސަރުކާރުން މަޢުހަދުއް ދިރާސާތިލް އިސްލާމިއްޔާ ކޮލެޖަކަށް ބަދަލުކުރައްވައި، ކުއްލިއްޔަތުއް ދިރާސާތިލް އިސްލާމިއްޔާގެ ނަމުގައި ހިންގަން ފެށުމުން އައްޝައިޚް މޫސާ ނިޒާރު އިބްރާހީމް ބަދަލުކުރެއްވީ ކުއްލިއްޔާގެ އެސިސްޓެންޓް ލެކްޗަރަރއަކަށެވެ. މީގެއިތުރުން މިނިސްޓްރީ އޮފް ހޯމް އެފެއާޒުގެ ޑިރެކްޓަރުކަމާއި، އެޓޯލްސް މިނިސްޓްރީގެ ޑިރެކްޓަރ ޖެނެރަލްގެ މަޤާމު އައްޝައިޚް މޫސާ ނިޒާރު އިބްރާހީމް އަދާކުރައްވައިފައިވެއެވެ.

އައްޝައިޚް މޫސާ ނިޒާރު އިބްރާހީމް އަދާކުރައްވައިފައިވާ އެހެނިހެން މަޤާމުތަކުގެ ތެރޭގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އެކުލަވައިލެއްވުމަށް އެއްކުރެއްވި ޚާއްޞަ މަޖިލީހުގެ ވ. އަތޮޅުގެ މެންބަރުކަމާއި، ރައްޔިތުންގެ މަޖިލީހުގެ ރައީސުލްޖުމްހޫރިއްޔާގެ މެންބަރުކަމާއި، ވ. އަތޮޅު ކައުންސިލުގެ މެންބަރުކަމާއި، ވ. އަތޮޅު ކައުންސިލުގެ ރައީސްކަން ހިމެނެއެވެ.