ޑރ. ޢަބްދުﷲ ޖަމީލް

ޑރ. ޢަބްދުﷲ ޖަމީލް ފުރަތަމަ ޑިގުރީ ޙާޞިލުކުރެއްވީ ސަޢޫދީ ޢަރަބިއްޔާގެ އަލްމަދީނަތުލްމުނައްވަރާގައި ހުންނަ އަލްޖާމިޢަތުލްއިސްލާމިއްޔާ (މަދީނާ އިސްލާމިކް ޔުނިވަރސިޓީ) އިން ޙަދީޘާއި އިސްލާމިކް ސްޓަޑީޒްގެ ރޮނގުންނެވެ. ޝަރީޢާއިން މާސްޓަރސް ޑިގްރީ ޙާޞިލުކުރެއްވީ ދިވެހިރާއްޖޭގެ ޤައުމީ ޔުނިވަރސިޓީގައެވެ. އެއަށްފަހު މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީގައި ޙަދީޘުން ޕީއެޗްޑީ ޙާޞިލުކުރެއްވިއެވެ.

ޑރ. ޢަބްދުﷲ ޖަމީލް އެންމެ ފުރަތަމަ ކިޔަވައިވިދާޅުވެގެން ރާއްޖެ ވަޑައިގަތުމަށް ފަހު މަސައްކަތްކުރެއްވީ ދިވެހިރާއްޖޭގެ އަޑުގައެވެ. ދިވެހިރާއްޖޭގެ އަޑުގައި މަސައްކަތްކުރެއްވި އިރު ދީނީ ޕްރޮގްރާމްތައް ޑރ. ޖަމީލް ވަނީ ތައްޔާރުކުރައްވައިފައެވެ. ޑރ. ޖަމީލަކީ ހުކުރު ޚުޠުބާ ލިޔުއްވާ ބޭފުޅެކެވެ. އަދި އެ މަނިކުފާނަކީ ނުބަލައި ޚުޠުބާ ކިޔުމުގެ ހުއްދަ އޮންނަ މަދު ބޭފުޅުންގެ ތެރޭގައި ހިމެނޭ ބޭފުޅެކެވެ.

ޑރ. ޢަބްދުﷲ ޖަމީލް މިހާރު ހުންނެވީ ދިވެހިރާއްޖޭގެ އިސްލާމީ ޔުނިވަރސިޓީގެ ކުއްލިއްޔާ އޮފް ޤުރްއާން އެންޑް ސުންނާގެ ސީނިއަރ ލެކްޗަރަރއެއްގެ މަޤާމުގައެވެ. މީގެއިތުރުން ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގައި ސީނިއަރ ލެކްޗަރަރއެއްގެ މަޤާމާއި، އެ ފެކަލްޓީގެ އެސިސްޓަންޓް ޕްރޮފެސަރުކަމާއި، ދިވެހިރާއްޖޭގެ އިސްލާމީ ޔުނިވަރސިޓީގެ ސެންޓަރ ފޯ ޕޯސްޓްގްރެޖުއޭޓް ސްޓަޑީޒްގެ ޑީންކަމުގެ މަޤާމު މީގެކުރީން އަދާކުރައްވައިފައިވެއެވެ.

ޑރ. ޢަބްދުﷲ ޖަމީލަށް 2019 ވަނަ އަހަރު ވަނީ ރައީސުލްޖުމްހޫރިއްޔާ ދެއްވާ ހިތްވަރުދިނުމުގެ ޤައުމީ އިނާމު އިސްލާމްދީނަށް ހޭލުންތެރިކަން އިތުރުކުރުމާއި، ޚިދުމަތް ކުރުމާއި، ދީނީ ޢިލްމު އުނގަންނައިދިނުމުގެ ދާއިރާއިން ލިބިވަޑައިގެންފައެވެ.