ސިޓީ

ސިޓީ އަކީ ދޭދޭ މީހުންގެ މެދުގައި އެންމެ ގިނައިން ބަދަލު ކުރެވޭ ލިޔުންތެރިކަމުގެ ލިޔުމެކެވެ. މިޒަމާނުގައި މުވާސަލާތީ ކަންކަން ކުރުއަރައި ފަހިވުމުގެ ސަބަބުން ސިޓިގެ މުހިންމުކަން ކުޑަ ވެގެނެއް ނުދެއެވެ. ފެކްސް ކުރެވޭ ލިޔުންތަކުގައި ސިޓީ އާއި އެއްވަރަށް ސިއްރު ހިފެހެއްޓޭނެ ގޮތެއް ނޯވެއެވެ. އުރައެއްގައި ބަންދުކޮށްފައި އޮންނަ ސިޓީ އަކަށް ދެވޭ ދަރަޖަ ދަށްވެގެން ނުދިޔައީ މިފަދަ ސަބަބުތަކަށްޓަކައެވެ.

ސިޓީގެ ބާވަތްތައް

ސިޓީ ބެހެނީ މަިގަނޑު 2 ބާވަތެއްގެ މައްޗަށެވެ. އެއީ ރަސްމީ ސިޓީ އާއި އަމިއްލަ ސިޓީއެވެ. ރަސްމީ ސިޓީއަކީ ރަސްމީ ފަރާތަކުން ލިޔާ ސިޓީ އެވެ. އަމިއްލަ ފަރާތަކުން ލިޔާ ކޮންމެ ސިޓިއެއް ވާނީ އަމިއްލަ ސިޓީ އަކަށެވެ. ނަމަވެސް މިއިން ކޮންމެ ބާވަތެއް 2 ބަޔަކަށް ބެހިފައި ވެއެވެ. އެއީ:

1. އަމިއްލ ސިޓީ: އަމިއްލަ ސިޓީއޭ ބުނެވެނީ ރަސްމީ އެއްވެސް ފަރާތެއް ބައިވެރި ނުވާ ސިޓީ އެވެ. އެއި އަމިއްލަ މީހަކު އަމިއްލަ އެހެން މީހަކަށް ފޮނުވާ ސިޓީ އެވެ. އާއިލާގެ މެންބަރުންނާއި އެކުވެރިންނަށް ފޮނުވާ ސިޓީއަކީ އަމިއްލަ ސިޓީ އެވެ.
2. އަމިއްލަ ރަސްމީ ސިޓީ: އަމިއްލަ ރަސްމި ސިޓީއަކީ އަމިއްލަ ފަރާތަކުން ރަސްމީ ފަރާތަކަށް ލިޔާ ސިޓީ އެވެ.
3. ރަސްމީ ރަސްމީ ސިޓީ: މިއީ ރަސްމީ އިދާރާއަކުން ރަސްމީ އިދާރާއަކަށް ފޮނުވާ ސިޓީ އެވެ.
4. ރަސްމީ އަމިއްލަ ސިޓީ: މިއީވެސް ރަސްމީ ސިޓީ އެކެވެ. ނަމަވެސް މިބާވަތުގެ ސިޓީ ލިބޭ ފަރާތަކީ އަމިއްލަ ފަރާތެކެވެ.