ދިވެހިރައްޔިތުންގެ ޑިމޮކްރެޓިކް ޕާޓީ

ދިވެހިރައްޔިތުންގެ ޑިމޮކްރެޓިކް ޕާޓީ

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) (އިނގިރޭސި: Maldivian Democratic Party) އަކީ ދިވެހިރާއްޖޭގައި ޙަރަކާތްތެރިވާ ސިޔާސީ ޕާޓީއެކެވެ. އެމްޑީޕީ އުފެދުނީ 2005ވަނަ އަހަރުގައެވެ. މިހައިތަނަށް ދެ ފަހަރެއްގެ މަތީން އެމްޑީޕީން ދިވެހިރާއްޖޭގެ ވެރިކަމަށް އައިސްފައިވެއެވެ.

އެމްޑީޕީ އެންމެ ފުރަތަމަ ޤާއިމުކުރެވުނީ ސިލޯނުގެ ކޮޅުނބުގައި އަރުވައިލެވިގެން ތިބެ، ނޮވެންބަރު 2003 ގައެވެ. ސިޔާސީ ޕާޓީ ހިންގުން ރައީސް އަލްއުސްތާޛު މައުމޫން ޢަބްދުލްޤައްޔޫމްގެ ސަރުކާރުން މަނާކޮށްފައި އޮތް ނަމަވެސް، އެމްޑީޕީން ދިޔައީ ޕާޓީ އުފެއްދުމަށް ބޭނުންވާ 42 މީހުންގެ ސޮއި ހޯދުމާއެކު، މުޅި ދިވެހިރާއްޖޭގައި އިންތިޒާމުވަމުންނެވެ.

ޖަނަވަރީ 2005 ގައި ބޭއްވުނު ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ތާޢީދުކުރާ ފަރާތްތަކުން އެ ކަން ޢާންމުކޮށް އިޢުލާންކޮށް ފުރަތަމަ ފަހަރަށް އެމްޑީޕީއަށް ނިސްބަތްވާ ކެންޑިޑޭޓުން ރައްޔިތުންގެ މަޖިލީހުގެ އިންތިޚާބުގައި ވާދަކުރިއެވެ. މިއާއެކު ޖޫން 2005 ގައި ޤާނޫނީ އޮނިގަނޑަށް ބަދަލު ގެނެސް، ދިވެހިރާއްޖޭގައި ސިޔާސީ ޕާޓީތައް ރަޖިސްޓަރީ ކުރުމަށް ޤާނޫނީ ބާރު ލިބި، ފުރަތަމަ ފަހަރަށް ހުއްދަ ލިބިގެންދިޔައެވެ. އެމްޑީޕީ ރަޖިސްޓްރީ ކޮށްފައިވަނީ 26 ޖޫން 2005 ގައެވެ.

ދިވެހިރާއްޖޭގައި ފުރަތަމަ ފަހަރަށް ގިނަ ޕާޓީ އެކުލެވޭ ވާދަވެރި ރިޔާސީ އިންތިޚާބެއް ބޭއްވީ 2008ވަނަ އަހަރުގެ އޮކްޓޫބަރު މަހުއެވެ. އެ އިންތިޚާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ ވޯޓު ކާމިޔާބުކުރެވިފައިނުވުމާ އެކު، އިދިކޮޅު ފަރާތްތަކުން އެމްޑީޕީގެ ކެންޑިޑޭޓުގެ ގޮތުގައި ނުކުންނެވި މުޙައްމަދު ނަޝީދަށް ތާޢީދުކުރެއްވިއެވެ. ދިވެހިރާއްޖޭގެ އެންމެ ފުރަތަމަ ފަހަރަށް ޑެމޮކްރެޓިކް ހަމަތަކުގެ މަތިން އިންތިޚާބުވެވަޑައިގަތް ރައީސްގެގޮތުގައި އެ ރިޔާސީ އިންތިޚާބުގެ ދެވަނަ ބުރު 54 އިންސައްތައިން ކާމިޔާބުކުރެއްވީ އެމްޑީޕީގެ ކެންޑިޑޭޓް ރައީސް މުޙައްމަދު ނަޝީދެވެ. 2013ވަނަ އަހަރުގެ ރިޔާސީ އިންތިޚާބުގައި ވެސް އެމްޑީޕީން ވާދަކުރިއެވެ. ނަމަވެސް އެ އިންތިޚާބު ކާމިޔާބުކޮށްފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ފަރާތުން ވާދަކުރެއްވި ޢަބްދުﷲ ޔާމީން ޢަބްދުލްޤައްޔޫމެވެ. 2018ވަނަ އަހަރުގެ ރިޔާސީ އިންތިޚާބުގައި އެމްޑީޕީއާއި ގުޅިފައިވާ ޕާޓީތަކުގެ ކޯލިޝަނުގެ ކެންޑިޑޭޓްގެ ގޮތުގައި އެމްޑީޕީގެ އިބްރާހީމް މުޙައްމަދު ޞާލިޙް ވާދަކުރައްވައި އެ އިންތިޚާބު ކާމިޔާބުކުރެއްވިއެވެ.

އެމްޑީޕީގެ މިހާރުގެ ރައީސަކީ ދިވެހިރާއްޖޭގެ ކުރީގެ ފޮރިން މިނިސްޓަރު ޢަބްދުﷲ ޝާހިދެވެ. ޗެއަރޕާސަނަކީ ދިވެހިރާއްޖޭގެ ކުރީގެ އިކޮނޮމިކް މިނިސްޓަރު ފައްޔާޟް އިސްމާޢީލެވެ.

އިންތިޚާބުތައް

ރިޔާސީ އިންތިޚާބު

އިންތިޚާބު	ޕާޓީގެ ކެންޑިޑޭޓު	ރަނިންގ މޭޓު	ލިބުނު ވޯޓުގެ ޢަދަދު	%	ލިބުނު ވޯޓުގެ ޢަދަދު	%	ނަތީޖާ
			ފުރަތަމަ ބުރު		ދެވަނަ ބުރު
2008ވަނަ އަހަރުގެ ރިޔާސީ އިންތިޚާބު	މުޙައްމަދު ނަޝީދު	ޑރ. މުޙައްމަދު ވަޙީދު ޙަސަން މަނިކު	44,293	24.91%	97,222	53.65%	ކާމިޔާބު
2013ވަނަ އަހަރުގެ ރިޔާސީ އިންތިޚާބު		މުސްޠަފާ ލުޠުފީ	95,224	45.45%	--------		އިންތިޚާބު ބާޠިލުކޮށްފައި N
			96,764	46.93%	105,181	48.61%	ނާކާމިޔާބު N
2018ވަނަ އަހަރުގެ ރިޔާސީ އިންތިޚާބު	އިބްރާހީމް މުޙައްމަދު ޞާލިޙް	ފައިޞަލް ނަސީމް	134,616	58.34%	--------		ކާމިޔާބު
2023ވަނަ އަހަރުގެ ރިޔާސީ އިންތިޚާބު		މުޙައްމަދު އަސްލަމް	85,989	39.12%	109,548	45.94%	ނާކާމިޔާބު N

ރައްޔިތުންގެ މަޖިލީހުގެ އިންތިޚާބު

އަހަރު	ޕާޓީގެ ލީޑަރު	ލިބުނު ވޯޓުގެ ޢަދަދު	%	ކާމިޔާބުކުރި ގޮނޑީގެ ޢަދަދު	+/–
2005	-	68,931	31.10%	42 ގޮނޑީގެ ތެރެއިން 18 ގޮނޑި	ވާދަކުރީ އަލަށް
2009	މުޙައްމަދު ނަޝީދު	51,184	30.81%	77 ގޮނޑީގެ ތެރެއިން 26 ގޮނޑި	15
2014		75,670	40.78%	85 ގޮނޑީގެ ތެރެއިން 26 ގޮނޑި	0
2019		96,354	45.83%	87 ގޮނޑީގެ ތެރެއިން 65 ގޮނޑި	39
2024	ޢަބްދުﷲ ޝާހިދު	64,650	30.73%	93 ގޮނޑީގެ ތެރެއިން 12 ގޮނޑި	53

ޕާޓީގެ ލީޑަރުން

ޕާޓީގެ ރައީސްކަން ކުރެއްވި ބޭފުޅުން

ނަން		މުއްދަތު
	އިބްރާހީމް އިސްމާޢީލް	20 ޑިސެންބަރު 2005 - 30 އެޕްރީލް 2006
	ޑރ. މުޙައްމަދު މުނައްވަރު	2 ޖޫން 2007 - 30 އެޕްރީލް 2008
	ޑރ. އިބްރާހީމް ދީދީ	10 މޭ 2011 - 30 އެޕްރީލް 2012
	މުޙައްމަދު ނަޝީދު	1 އެޕްރީލް 2014 - 21 ޖޫން 2023
	ޢަބްދުﷲ ޝާހިދު	20 ފެބުރުވަރީ 2024އިން ފެށިގެން

ޗެއަރޕާސަންކަން ކުރެއްވި ބޭފުޅުން

ނަން		މުއްދަތު
	މުޙައްމަދު ނަޝީދު	26 ޖޫން 2005 - 20 ފެބުރުވަރީ 2008
	މާރިޔާ އަޙްމަދު ދީދީ	12 މޭ 2008 - 19 މޭ 2011
	ރީކޯ މޫސާ މަނިކު	19 ޖޫން 2011 - 1 އެޕްރީލް 2014
	ޢަލީ ވަޙީދު	30 އޮގަސްޓު 2014 - 28 ނޮވެންބަރު 2016
	ޙަސަން ލަޠީފު	12 ފެބުރުވަރީ 2017 - 11 ފެބުރުވަރީ 2022
	ފައްޔާޟް އިސްމާޢީލް	23 މޭ 2022އިން ފެށިގެން