މުޙައްމަދު ޝުޖާޢު ޢަބްދުލްޙަކީމް
ޑރ. މުޙައްމަދު ޝުޖާޢު ޢަބްދުލްޙަކީމަކީ ޤާނޫނީ ދާއިރާއިން ޕީއެޗްޑީ ހައްދަވައިފައިވާ ބޭފުޅެކެވެ.
ޑރ. މުޙައްމަދު ޝުޖާޢު ޢަބްދުލްޙަކީމް ފުރަތަމަ ޑިގުރީ ހާސިލުކުރެއްވީ ޤާނޫނީ ދާއިރާއިން މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީގައެވެ. ހަމަ އެ ޔުނިވަރސިޓީގައި ޤާނޫނީ ދާއިރާއިން މާސްޓަރސް ޑިގުރީ ހާސިލުކުރެއްވިއެވެ. އަދި އިންޓަރނޭޝަނަލް ސެންޓަރ ފޯ އެޑިޔުކޭޝަން އިން އިސްލާމިކް ފައިނޭންސްގައި އިސްލާމިކް ފައިނޭންސްގެ ދާއިރާއިން މާސްޓަރސް ޑިގުރީ ހާސިލުކުރައްވައިފައިވެއެވެ. މީގެއިތުރުން ބިޒްނަސް އެޑްމިނިސްޓްރޭޝަންގެ ދާއިރާއިން އޭޝިޔާ އީ ޔުނިވަރސިޓީގައި މާސްޓަރސް ޑިގުރީއެއް ހައްދަވައިފައިވެއެވެ.
ޑރ. މުޙައްމަދު ޝުޖާޢު ޕީއެޗްޑީ ހާސިލުކުރެއްވީ ޤާނޫނީ ދާއިރާއިން މެލޭޝިޔާގެ އިންޓަރނޭޝަނަލް އިސްލާމިކް ޔުނިވަރސިޓީގައެވެ. ޕީއެޗްޑީ ހެއްދެވިއިރު ޚާއްޞަވެވަޑައިގެންފައިވަނީ އިސްލާމިކް ފައިނޭންސްގެ ދާއިރާއަށެވެ.
ޑރ. މުޙައްމަދު ޝުޖާޢު ޢަބްދުލްޙަކީމް ވަނީ ދިވެހިރާއްޖޭގެ އިސްލާމީ ޔުނިވަރސިޓީގެ ކުއްލިއްޔާ އޮފް ޝަރީޢާ އެންޑް ލޯގެ ޑީންކަން 2015 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ކުރައްވައިފައެވެ. އަދި ދިވެހިރާއްޖެ އާއި މެލޭޝިޔާގެ މަތީ ތަޢުލީމު ދޭ ބައެއް މުއައްސަސާތަކުގައި ލެކްޗަރަރެއްގެ ގޮތުގައި މަސައްކަތް ކުރައްވައިފައިވެއެވެ. ޑރ. މުޙައްމަދު ޝުޖާޢު ޢަބްދުލްޙަކީމް މިހާރު ހުންނެވީ މިނިސްޓްރީ އޮފް އިސްލާމިކް އެފެއާޒްގެ ސްޓޭޓް މިނިސްޓަރުގެ މަޤާމުގައެވެ. އަދި ދިވެހިރާއްޖޭގެ ޒަކާތު ހައުސްގެ ޝަރީޢާ ބޯޑުގެ މެންބަރުކަން ވެސް އެ މަނިކުފާނު ގެންދަވަނީ ކުރައްވަމުންނެވެ.