ޞަލާޙު އަލްބުދައިރު
މަސްޖިދުއްނަބަވީގެ އިމާމު އަދި ޚަޠީބު އަދި މަދީނާގެ މަޙްކަމަތުލްއިސްތިއުނާފުގެ އިސް ފަނޑިޔާރު ފަޟީލަތުއްޝައިޚު ޑޮކްޓަރ ޞަލާޙު ބުނު މުޙައްމަދުލްބުދައިރު ދުނިޔޭގެ އަލިކަން ދެކެވަޑައިގަތީ މީލާދީ ގޮތުން 1970ވަނަ އަހަރު މަދީނަތުލްހުފޫފުގައެވެ. ޝައިޚުގެ ދަރިފަސްކޮޅު ބަނީ ތަމީމު ޤަބީލާއާ ގުޅިފައިވެއެވެ.
އައްޝައިޚު ޑރ. ޞަލާޙުލްބުދައިރަކީ އެންމެ ތުއްޕުޅު އިރުއްސުރެ ވެސް ޢިލްމަށާއި ޢިލްމު އުނގެނުމަށް ނުހަނު ލޯބިކުރެއްވި ޝަޚްޞިއްޔަތެކެވެ. ޅަ ޢުމުރުފުޅެއްގައި ކީރިތި ޤުރްއާން ހިތުދަސްކުރެއްވުމަށްފަހު އުފަން ރަށް ހުފޫފުގައި ތަޢުލީމު އުނގެނިވަޑައިގެންނެވުމުގެ ދިގު ދަތުރު ފެއްޓެވި ނަމަވެސް، ޢިލްމު ޙާޞިލުކުރުމާއި ޢިލްމު އުނގަންނައިދިނުމާއި ޤާޟީކަމާއި އިމާމުވެ ނަމާދުކުރެއްވުމުގައި ސަޢޫދީ ޢަރަބިއްޔާގެ އެކިއެކި ސިޓީތަކަށް ދަތުރުކުރެއްވިއެވެ. އެ ގޮތުން އެމަނިކުފާނު ޝަރީޢާގެ ދާއިރާ އިން ފުރަތަމަ ޑިގުރީ ޙާޞިލުކުރެއްވީ ސަޢޫދީ ޢަރަބިއްޔާގެ ވެރިރަށް، އައްރިޔާޟުގެ މަޝްހޫރު ޔުނިވަރސިޓީއެއް ކަމަށްވާ ޖާމިޢަތު އަލްއިމާމް މުޙައްމަދު ބުން ސުޢޫދު އަލްއިސްލާމިއްޔާއިންނެވެ. އެއަށްފަހު ހަމަ އެ ސިޓީގައި ހުންނަ އަލްމަޢުޙަދުލްޢާލީ ލިލްޤަޟާއިން ފިޤްހުލްމުޤާރަނާގެ ދާއިރާއިން މާސްޓަރސް ޑިގުރީ ޙާޞިލުކުރައްވައި ޤާޟީއެއްގެ ގޮތުގައި ދަސްވެނިވެވަޑައިގަތެވެ. އެއަށްފަހު 2023ވަނަ އަހަރު، އަލްޙައްސާއުގެ އަލްމަލިކު ފައިޞަލް ޔުނިވަރސިޓީން ދިރާސާތުލްއިސްލާމިއްޔާ ބައިގެ ފިޤްހުގެ ރޮނގުން ޕީއެޗްޑީ ޙާޞިލުކުރައްވައިފައިވެއެވެ.
އަލްމަދީނަތުލް މުނައްވަރާގެ މަސްޖިދުއްނަބަވީގެ އިމާމެއްގެ ގޮތުގައި ޢައްޔަންކުރެވުމުގެ ކުރިން ރަސްމީ އިމާމެއްގެ ގޮތުގައި ޝައިޚް ޞަލާޙު އަލްބުދައިރު އިމާމުކަމުގެ ވަޒީފާ ފެއްޓެވީ ދައްމާމު ސިޓީގައެވެ. އެއަށްފަހު އައްރިޔާޟު ސިޓީގައި ވެސް އިމާމެއްގެ ގޮތުގައި ދުވަސްތަކެއް ހޭދަކުރެއްވިއެވެ. މަދީނާގެ ޙަރަމްފުޅު ކަމުގައިވާ އަލްމަސްޖިދުއްނަބަވީގެ އިމާމު އަދި ޚަޠީބެއްގެ ގޮތުގައި ފަޟީލަތުއްޝައިޚު ޑޮކްޓަރ ޞަލާޙުލް ބުދައިރު ޢައްޔަނުކުރެއްވީ 1999ވަނަ އަހަރުގައެވެ. އެކި އަހަރުތަކުގައި ޝައިޚަށް ވަނީ މައްކާގެ މަސްޖިދުލްޙަރާމުގައި ވެސް އިމާމުވެ ތަރާވީޙް ނަމާދު ކުރެއްވުމުގެ ފުރުޞަތު ލިބިވަޑައިގެންފައެވެ.
އިމާމުކަމުގެ އިތުރުން އައްޝައިޚު ޑރ. ޞަލާޙު އަލްބުދައިރު ވަނީ ޤާޟީއެއްގެ ގޮތުގައި ވެސް މަސައްކަތްކުރައްވައިފައެވެ. އެގޮތުން 1993 އިން 1994 އަށް އައްރިޔާޟު ސިޓީގެ މަޙްކަމަތުލްކުބްރާގައި ޤާޟީކަން ކުރެއްވިއެވެ. އަދި އޭގެ ފަހުން 1995ވަނަ އަހަރު ޢަސީރު ސިޓީގެ ކޯޓުގައި ޤާޟީކަން ކުރެއްވިއެވެ. ޖެހިގެން އައި 1996ވަނަ އަހަރު ދައްމާމުގެ މަޙްކަމަތުލްކުބްރާގައި ޤާޟީއެއްގެ ގޮތުގައި މަސައްކަތްކުރެއްވުމަށްފަހު 1997 އިން 1999 އަށް މަދީނަތުލް މުނައްވަރާގެ މަޙްކަމަތުލްކުބްރާގައި ޤާޟީކަން ކުރެއްވިއެވެ.